ଜୀବନଦର୍ଶନଭିତ୍ତିକ ମୂଲ୍ୟବୋଧ ଓ ରାମଚନ୍ଦ୍ର ମିଶ୍ରଙ୍କ ନାଟକ

Abstract

    ବିଂଶ ଶତାବ୍ଦୀର ମଧ୍ୟ ଭାଗରେ ପହଞ୍ଚି ଅତୀତକୁ ଦୃଷ୍ଟି ନିକ୍ଷେପ କଲେ ଯେଉଁ କେତେଜଣ ସମାଜସଚେତକ ଓ ପ୍ରତିଭାବାନ ନାଟ୍ୟକାରଙ୍କ କଥା ମନେପଡେ, ସେମାନଙ୍କ ମଧ୍ୟରେ ସଫଳ ଓ ଆଦର୍ଶବାଦୀ ନାଟ୍ୟକାର ହେଉଛନ୍ତି ରାମଚନ୍ଦ୍ର ମିଶ୍ର । ପୁରୀ ଜିଲ୍ଲାର ଦଶପଲ୍ଲା ନିକଟସ୍ଥ କୁଞ୍ଜବନ ଗଡ଼ରେ ୧୯୨୦ ମସିହା ଅକ୍ଟୋବର ୧୨ ତାରିଖରେ ରାମଚନ୍ଦ୍ର ମିଶ୍ର ଜନ୍ମଗ୍ରହଣ କରିଥିଲେ ଏକ ସଂସ୍କୃତିସମ୍ପନ୍ନ କୁଳୀନ ବ୍ରାହ୍ମଣ ପରିବାରରେ। ନାଟ୍ୟମୋଦି ପିତା ସ୍ବର୍ଗତ ବିଦ୍ୟାଧର ମିଶ୍ର ଓ ମାତା ରାଧାରାଣୀ ଦେବୀଙ୍କ ସୁଯୋଗ୍ୟ ସନ୍ତାନ ରୂପେ ଧରାପୃଷ୍ଠରେ କରିଥିଲେ ଅବତରଣ। ପିତା ଆଦର୍ଶ ଶିକ୍ଷକ ତଥା ଅଭିନେତା ଓ ସର୍ବୋପରି ସାହିତ୍ୟାନୁରାଗୀ ଥିବାବେଳେ ମାତା ଥିଲେ ଧର୍ମପରାୟଣା ଓ ନିଷ୍ଠା ଆଦର୍ଶର ଏକ ମୂର୍ତ୍ତିମତୀ ଦେବୀ। ପିତାମାତାଙ୍କର ଆଶୀର୍ବାଦ ଓ ଆଦର୍ଶ ସମୟକ୍ରମେ ପୁତ୍ର ରାମଚନ୍ଦ୍ରଙ୍କୁ ପ୍ରତିଷ୍ଠା କରାଇବାରେ ଖୋରାକ ଯୋଗାଇଥିଲା। ତେଣୁ  ତରୁଣ ବୟସରୁ ସେ ପାଇଥିଲେ ଧୂରୀଣ ନାଟ୍ୟକାରର ପରିଚୟ। ଯେଉଁ ବୟସରେ ସାଙ୍ଗସାଥୀଙ୍କ ସହ ମଉଜମଜଲିସ କରିବାର କଥା ସେହି ବୟସରୁ ହିଁ ସେ କବିତା ଓ ଗଳ୍ପ ଲେଖାରେ ମନୋନିବେଶ କରିଥିଲେ। ସେ କେବେ ଭାବି ନଥିଲେ ଯେ ଦିନେ ସଫଳ ନାଟ୍ୟକାର ହୋଇ ବାହାରିବେ ବୋଲି। ସ୍ୱାଧୀନତା ପୂର୍ବରୁ ୫ ବର୍ଷ ଓ ପରେ  ୪୫ ବର୍ଷ ପର୍ଯ୍ୟନ୍ତ ସିଏ ଯାହା ସମାଜର ରୂପରଙ୍ଗକୁ ଦେଖିଛନ୍ତି ବା ଅନୁଭବ କରିଛନ୍ତି ସେହି ଜୀବନାନୁଭୁତିକୁ ଉପସ୍ଥାପନ କରିଛନ୍ତି ତାଙ୍କ ନାଟକଗୁଡ଼ିକ ମାଧ୍ୟମରେ।